व्यक्तिगत जानकारी सम्बन्धी आधिकारिक सूचना

जारी मिति: ३० अक्टोबर २०२५
अद्यावधिक मिति: ३१ जुलाई २०२६

■ टप सिमसँग सम्बन्धित व्यक्तिगत जानकारीको व्यवस्थापन सम्बन्धी

ब्रास्टेल कं., लि. (यसपछि "हामी", "हाम्रो" वा "कम्पनी" भनिने) ले टप सिम सेवा (यसपछि "सेवा" भनिने) सँग सम्बन्धित व्यक्तिगत जानकारीको व्यवस्थापनका लागि यो नीति स्थापना गरेको छ।

एप्लिकेसन इन्स्टल गरेर वा वेबसाइटमा लगइन गरी सेवा प्रयोग गर्दा, तपाईले यस नीतिमा सहमति जनाउनुभएको मानिनेछ। हामी व्यक्तिगत जानकारीको सुरक्षाको महत्त्वलाई स्वीकार गर्दछौं र हामीलाई सुम्पिएको जानकारीलाई तल वर्णन गरिए अनुसार पारदर्शी, जिम्मेवार र व्यावसायिक रूपमा व्यवस्थापन गर्न प्रतिबद्ध छौं।

१. हामीले सङ्कलन वा प्रशोधन गर्ने व्यक्तिगत जानकारी

सेवा प्रदान गर्नका लागि हामी कानूनसम्मत र उपयुक्त माध्यमबाट निम्न व्यक्तिगत जानकारीहरू सङ्कलन गर्दछौं। यद्यपि केही जानकारीहरू (जस्तै: डिभाइस पहिचानकर्ता) ले आफैँमा कुनै निश्चित व्यक्तिलाई पहिचान गर्न नसके तापनि, अन्य जानकारीहरूसँग मिलाउँदा कुनै व्यक्तिलाई पहिचान गर्न सक्ने अवस्था भएमा, हामी त्यसलाई व्यक्तिगत जानकारी सरह मानी उचित व्यवस्थापन गर्नेछौं।

वर्ग	सङ्कलन गरिने मुख्य जानकारी	प्रयोगको उद्देश्य
ग्राहकको जानकारी (भौतिक सिम खरिद गर्दा)	अर्डर आईडी, इमेल ठेगाना, थर, नाम (ऐच्छिक), ठेगाना, टेलिफोन नम्बर (ऐच्छिक)	आवेदन प्रक्रिया सम्पादन, पहिचान प्रमाणीकरण, अर्डर व्यवस्थापन, सामान डेलिभरी र सेवा सम्बन्धी महत्वपूर्ण सूचनाहरू प्रवाह गर्न तथा कस्टमर सपोर्ट उपलब्ध गराउन
खाताको जानकारी	युजरनेम, पासवर्ड, अथेन्टिकेसन विवरण र अकाउन्ट सेटिङहरू	अकाउन्ट बनाउन र व्यवस्थापन गर्न, प्रयोगकर्ताको पहिचान पुष्टि गर्न, अनधिकृत पहुँच नियन्त्रण र प्रयोगकर्ताका प्राथमिकताहरू सुरक्षित राख्न
अर्डर र कारोबार सम्बन्धी जानकारी	हेर्नुभएका सामानहरू, सपिङ कार्टका सामग्रीहरू, विसलिस्टका विवरणहरू, खरिद गरिएका सामानहरू र तिनको परिमाण, विगतका अर्डरहरू र खरिद सम्बन्धी जानकारी	अर्डर प्रक्रिया, मौज्दात तथा ढुवानी व्यवस्थापन, फिर्ता र साटफेर प्रक्रिया, कारोबार अभिलेख व्यवस्थापन तथा सेवा सुधार गर्न
भुक्तानी व्यवस्थापन सम्बन्धी जानकारी	रोज्नुभएको भुक्तानी विधि, खरिद रकम, भुक्तानी मिति र समय, भुक्तानीको स्थिति, कारोबार पहिचान नम्बर इत्यादि	भुक्तानी पुष्टि गर्न, अर्डर अनुसार भुक्तानी मिलान गर्न र लेखा सम्बन्धी हिसाब राख्न
डिभाइस र प्रयोग सम्बन्धी जानकारी	आईपी ठेगाना, डिभाइस, ब्राउजर र नेटवर्क सम्बन्धी जानकारी, कुकीज, डिभाइस पहिचानकर्ताहरू र सोही प्रकारका अन्य पहिचानकर्ताहरू (विस्तृत विवरणका लागि, कृपया एप्लिकेसन गोपनीयता नीति हेर्नुहोस्)	वेबसाइट सञ्चालन गर्न, सामग्रीहरू सजिलै देखिने बनाउन, प्रयोगको विश्लेषण गर्न, समस्याहरू सुल्झाउन, सुरक्षा कायम राख्न, जालसाजी पहिचान गरेर सेवालाई सुधार गर्न
मार्केटिङ सम्बन्धी जानकारी	खरिद इतिहास, हेरिएका सामग्रीको विवरण, सम्पर्क गर्ने प्राथमिकताहरू तथा क्याम्पेनहरूमा सहभागिताको जानकारी	तपाईको सहमति वा लागू हुने कानूनले अनुमति दिएको दायराभित्र रही उत्पादन तथा सेवाहरूबारे जानकारी प्रदान गर्न, विज्ञापनको प्रभावकारिता मापन गर्न र व्यक्तिगत रुचि अनुसार सामग्रीहरू उपलब्ध गराउन

२. बाह्य सेवा प्रदायकहरूसँगको सम्बन्ध

२.१ Shopify सँगको सम्बन्ध र जापान बाहिरका तेस्रो पक्षहरूलाई विवरण उपलब्ध गराउने प्रक्रिया

यो सेवाले विश्वव्यापी रूपमा मान्यता प्राप्त इ-कमर्स प्लेटफर्म Shopify को प्रयोग गर्दछ। फलस्वरूप, तपाईको व्यक्तिगत जानकारी तल वर्णन गरिए अनुसार व्यवस्थापन गरिन्छ। हामीले तपाईको व्यक्तिगत जानकारी प्रशोधन गर्ने कार्य Shopify लाई जिम्मा दिएका छौं। हाम्रो निगरानीमा Shopify ले हाम्रो डाटा प्रशोधनकर्ताको रूपमा उक्त जानकारीको व्यवस्थापन गर्दछ।

इ-कमर्स प्लेटफर्म उपलब्ध गराउन तथा सुधार गर्न, सुरक्षा सुनिश्चित गर्न, ठगी नियन्त्रण गर्न, विश्लेषण गर्न र अन्य सम्बन्धित उद्देश्यका लागि Shopify ले यस सेवामा तपाईको पहुँच र प्रयोगसँग सम्बन्धित जानकारीहरू सङ्कलन तथा प्रशोधन गर्दछ। यस सेवामा तपाईले उपलब्ध गराउनु भएका जानकारीहरू, हाम्रा नियम तथा शर्तहरू र Shopify सँगको हाम्रो सम्झौता अनुसार, सेवा प्रदान गर्न र सुधार गर्ने उद्देश्यका लागि Shopify ले आफ्नो सिस्टम मार्फत आफ्ना साझेदार र उप-ठेकेदारहरूसँग उक्त जानकारीहरू आदानप्रदान र प्रशोधन गर्न सक्छन्।

यसका साथै, जब हामी Shopify का नेटवर्क सुविधाहरू, व्यक्तिगत रुचि अनुसारका सेवाहरू, विज्ञापनमा सहयोग वा अन्य विस्तारित सुविधाहरू प्रयोग गर्दछौँ, तब Shopify ले हाम्रा स्टोर, अन्य व्यापारीहरू र Shopify का सेवाहरूसँगको तपाईको अन्तर्क्रियाबाट प्राप्त जानकारीहरूलाई एकीकृत गरेर प्रशोधन गर्न सक्छ। Shopify को आफ्नै उद्देश्यका लागि गरिने प्रशोधनको हकमा, Shopify स्वयं यसको गोपनीयता नीतिअनुसार जिम्मेवार हुनेछ र आफ्नो गोपनीयता अधिकार प्रयोग गर्ने व्यक्तिहरूका अनुरोधहरूको सम्बोधन गर्नेछ।

Shopify ले व्यक्तिगत जानकारी कसरी व्यवस्थापन गर्छ भन्ने थप जानकारीका लागि कृपया हेर्नुहोस्: Shopify Consumer Privacy Policy

Shopify क्यानाडामा मुख्यालय रहेको एक अन्तर्राष्ट्रिय कम्पनी हो। त्यसैले, तपाईका व्यक्तिगत विवरणहरू क्यानाडा, अमेरिका वा जापान बाहिरका अन्य देशहरूमा रहेका Shopify, यससँग सम्बद्ध कम्पनी वा उप-ठेकेदारहरूले सुरक्षित राख्न र प्रयोग गर्न सक्छन्। व्यक्तिगत जानकारी स्थानान्तरण हुने देश वा क्षेत्रहरू Shopify को सेवा संरचना, डाटा होस्टिङ व्यवस्था र उप-ठेक्का सम्बन्धका आधारमा परिवर्तन हुन सक्छन्।

जापान बाहिर रहेका व्यावसायिक सञ्चालकहरूलाई व्यक्तिगत डाटा उपलब्ध गराउँदा वा सोको प्रशोधन गर्ने जिम्मेवारी सुम्पिँदा, हामी लागू हुने व्यक्तिगत जानकारी संरक्षण कानूनहरू बमोजिम आवश्यक उपायहरू अवलम्बन गर्नेछौं। यस अन्तर्गत आवश्यक परेको खण्डमा सम्बन्धित व्यक्तिको सहमति लिने, सम्झौता वा अन्य उपायमार्फत उपयुक्त सुरक्षात्मक प्रबन्धहरू कायम राखिएको पुष्टि गर्ने र नियमहरूको पालना भए नभएको निरन्तर अनुगमन गर्ने कार्यहरू समावेश छन्। सम्बन्धित व्यक्तिबाट अनुरोध भएमा, हामी लागू हुने कानून अनुसार डाटा प्राप्तकर्ताको डाटा संरक्षण गर्ने ढाँचा र हामीद्वारा लागू गरिएका सुरक्षात्मक उपायहरूबारे जानकारी गराउनेछौं।

Shopify को अन्तर्राष्ट्रिय डाटा ट्रान्सफरहरू सम्बन्धी थप जानकारीका लागि कृपया हेर्नुहोस्: Shopify – International Transfers of Personal Data

विदेशमा रहेका तेस्रो पक्षलाई व्यक्तिगत जानकारी प्रदान गर्ने सम्बन्धमा (क्यानाडा, संयुक्त राज्य अमेरिका आदि)

Shopify प्रयोगको फलस्वरूप, तपाईको व्यक्तिगत विवरणहरू क्यानाडा, अमेरिका वा अन्य देशहरूमा रहेका Shopify का सर्भरहरूमा पठाउन, सुरक्षित राख्न र प्रयोग हुन सक्छन्।

• विदेशी मुलुकहरूमा व्यक्तिगत जानकारी संरक्षण प्रणाली सम्बन्धी विवरणका लागि, कृपया जापानको व्यक्तिगत जानकारी संरक्षण आयोगले प्रकाशित गरेको Survey on Personal Information Protection Systems in Foreign Countries हेर्नुहोस्।

२.२ दूरसञ्चार सेवा प्रदायकहरूलाई जिम्मेवारी हस्तान्तरण

यो सेवा प्रदान गर्न (दूरसञ्चार सेवाहरूको सञ्चालन र नेटवर्कको मर्मतसम्भार तथा व्यवस्थापन समेत), हामीले सम्झौता गरेका दूरसञ्चार सेवा प्रदायकहरूलाई व्यक्तिगत पहिचान नखुल्ने डिभाइस जानकारी र सोही प्रकारका अन्य विवरणहरूको प्रशोधन गर्ने कार्य पूर्ण वा आंशिक रूपमा जिम्मा लगाउन सक्नेछौं।

३. क्रेडिट कार्ड सम्बन्धी जानकारीको व्यवस्थापन

तपाईले यस सेवाको भुक्तानीका लागि क्रेडिट कार्ड प्रयोग गर्दा, क्रेडिट कार्ड भुक्तानी सेवा प्रदायकले आफ्नो पेमेन्ट सिस्टम मार्फत तपाईको क्रेडिट कार्ड नम्बर, म्याद समाप्त हुने मिति र सेक्युरिटी कोड सम्बन्धी जानकारी प्रत्यक्ष रूपमा सङ्कलन तथा प्रयोग गर्दछ। हामी यी कार्डसम्बन्धी जानकारी सङ्कलन गर्ने, सुरक्षित राख्ने वा हेर्ने काम गर्दैनौँ।

४. सम्पर्क जानकारी

यदि यस सेवासँग सम्बन्धित व्यक्तिगत जानकारीको व्यवस्थापनबारे कुनै गुनासो, सोधपुछ, परामर्शको अनुरोध छ वा आफ्ना अधिकारहरू प्रयोग गर्न चाहनुहुन्छ भने, कृपया निम्न ठेगानामा सम्पर्क गर्नुहोस्:

व्यक्तिगत जानकारी संरक्षण प्रशासक

• ठेगाना: २-६-२ योकोआमी, सुमिदा-कु, टोक्यो १३०-००१५, जापान
• इमेल: privacy@brastel.co.jp

■ कम्पनीद्वारा सुरक्षित राखिएको व्यक्तिगत जानकारी सम्बन्धी

1. व्यक्तिगत जानकारी व्यवस्थापन गर्ने व्यवसाय सञ्चालकको नाम, ठेगाना तथा प्रमुख कार्यकारी अधिकृतको नाम

   नाम: ब्रास्टेल कं., लि.
   ठेगाना: २-६-२ योकोआमी, सुमिदा-कु, टोक्यो १३०-००१५, जापान
   सीईओहरू: जुन्जी तानाबे, केन्जी खावाई (बहु-प्रतिनिधि प्रणाली अपनाइएको)

2. व्यक्तिगत जानकारी संरक्षण प्रबन्धकको पद, विभाग, र सम्पर्क जानकारी

   सामान्य प्रबन्ध निर्देशक, जुन अकी (सम्पर्क जानकारीका लागि तलको "व्यक्तिगत जानकारी सम्बन्धी गुनासो तथा परामर्श डेस्क" हेर्नुहोस्)

3. हाम्रा साथमा रहेका सबै व्यक्तिगत विवरणहरू प्रयोग गर्नुको उद्देश्य

   वर्ग	प्रयोगको उद्देश्य
   ग्राहकको व्यक्तिगत जानकारी	सम्झौताका प्रावधानहरू कार्यान्वयन तथा उचित व्यवस्थापन गर्न ग्राहकहरूलाई सहायता प्रदान गर्न सेवा प्रयोगको इतिहास व्यवस्थापन गर्न कम्पनीका सेवाहरूबारे मार्गदर्शन उपलब्ध गराउन ग्राहकका सोधपुछहरूको जवाफ दिन सर्वेक्षण, प्रतियोगिता, क्याम्पेन तथा अन्य बजारीकरण सम्बन्धी अनुसन्धान गर्न
   कम्पनीसँग सम्पर्क गरेका व्यक्तिहरूको व्यक्तिगत जानकारी	हाम्रो ग्राहक सेवामा सुधार ल्याउन सम्पर्क तथा सोधपुछहरूलाई स्पष्टसँग बुझेर उचित प्रतिक्रिया दिन

4. सुरक्षित राखिएको व्यक्तिगत जानकारीको व्यवस्थापन सम्बन्धी गुनासो गर्ने सम्पर्क केन्द्र

   "व्यक्तिगत जानकारी सम्बन्धी गुनासो तथा परामर्श डेस्क" (अन्त्यमा सूचीबद्ध गरिएको)

5. मान्यता प्राप्त व्यक्तिगत जानकारी संरक्षण संस्थाको नाम तथा गुनासो समाधानका लागि सम्पर्क जानकारी

   अधिकृत व्यक्तिगत जानकारी संरक्षण संस्थाको नाम:
   जापान इन्स्टिच्युट फर प्रमोसन अफ डिजिटल इकोनोमी एन्ड कम्युनिटी (JIPDEC)

   गुनासो समाधानका लागि सम्पर्क गर्ने ठाउँ:
   मान्यता प्राप्त व्यक्तिगत जानकारी संरक्षण संस्था प्रशासन कार्यालय
   ठेगाना: १-९-९ रोप्पोङ्गी, मिनातो-कु, टोक्यो १०६-००३२, रोप्पोङ्गी फर्स्ट बिल्डिङ भित्र
   फोन नम्बर: 03-5860-7565 / 0120-700-779

6. जानकारी खुलासाका लागि दिइने अनुरोधहरूको सम्बोधन प्रक्रिया

   सम्बन्धित व्यक्ति वा निजका प्रतिनिधिहरूबाट कम्पनीसँग रहेका व्यक्तिगत जानकारी वा तेस्रो पक्षलाई उपलब्ध गराएका विवरणहरूको अभिलेख सम्बन्धी प्रयोगको उद्देश्य थाहा पाउन, विवरण खुलासा गर्न, संशोधन गर्न, विषयवस्तु थपघट गर्न (तलको टिप्पणी हेर्नुहोस्), प्रयोगमा रोक लगाउन, पूर्ण रूपमा मेटाउन र तेस्रो पक्षलाई उपलब्ध गराउने कार्य रोक्न गरिएका अनुरोधहरूका लागि (यसपछि "विवरण खुलासा सम्बन्धी अनुरोधहरू, आदि" भनिनेछ), कृपया तल सूचीबद्ध गरिएको "व्यक्तिगत जानकारी सोधपुछ डेस्क" मा सम्पर्क गर्नुहोस्।

   टिप्पणी: विवरणहरू मेटाउने विषयमा, कम्पनीले सुरक्षा, ठगी नियन्त्रण र कानूनी आवश्यकताहरू बमोजिम निश्चित अवधिसम्म व्यक्तिगत डाटा सुरक्षित राख्नुपर्ने हुनसक्छ (जस्तै: वित्तीय अपराध नियन्त्रण कानून अनुसार ७ वर्ष र मोबाइल प्रयोग सम्बन्धी कानून अनुसार ३ वर्ष)। यस्ता अवस्थाहरूमा, हामी डाटालाई सकेसम्म गोप्य राखेर त्यसको सुरक्षा सुनिश्चित गर्ने उपायहरू लागू गर्नेछौं।

   1. विवरण खुलासा सम्बन्धी अनुरोधहरूका लागि सम्पर्क केन्द्र

      "व्यक्तिगत जानकारी सम्बन्धी गुनासो तथा परामर्श डेस्क" (अन्त्यमा सूचीबद्ध गरिएको)

      टिप्पणी: यदि तपाई विद्युतीय माध्यम मार्फत विवरण प्राप्त गर्न चाहनुहुन्छ भने, कृपया सो कुरा स्पष्ट पार्नुहोला। हामी तपाईको अनुरोध अनुसार आवश्यक प्रतिक्रिया दिनेछौं।

   2. विवरण खुलासाको लागि निवेदन दिने फारम र प्रक्रिया

      कृपया निम्न विवरणहरू हाम्रो "व्यक्तिगत जानकारी सम्बन्धी गुनासो तथा परामर्श डेस्क" मा हुलाक वा कुरियरमार्फत पठाउनुहोला। हामी कुनै ढिलाइ नगरी तुरुन्तै सम्बोधन गर्नेछौं। हुलाक वा कुरियर बाहेकका अन्य माध्यमहरू (जस्तै: प्रत्यक्ष भेटघाट, इमेल, फ्याक्स आदि) बाट गरिएका विवरण खुलासा सम्बन्धी अनुरोधहरू स्वीकार गरिने छैन।

      1. क. कम्पनीले तोकेको "विवरण खुलासा सम्बन्धी आवेदन फारम"

         यदि तपाईसँग यो फारम छैन भने, कृपया हामीलाई सम्पर्क गर्नुहोस्। हामी तपाईलाई उक्त फारम पठाइदिनेछौं।

      2. ख. परिचय खुल्ने कागजातहरू

         1. यदि सम्बन्धित व्यक्ति आफैँले अनुरोध गरेमा

            सम्बन्धित व्यक्तिको आधिकारिक परिचयपत्रको प्रतिलिपि

         2. प्रतिनिधि मार्फत अनुरोध गरिएको अवस्थामा

            निम्न सूचीमा उल्लेख भएका आवश्यक पर्ने सबै कागजातहरू:

            1. क. प्रतिनिधिको अधिकार पुष्टि गर्ने कागजातहरू:

               1. कानुनी प्रतिनिधि:

                  पारिवारिक लगत वा कानूनी अधिकार प्रमाणित गर्ने अन्य कागजात

               2. स्वेच्छिक प्रतिनिधि (तल उल्लेखित सबै कागजातहरू):

                  • कम्पनीद्वारा तोकिएको अधिकृत वारेसनामा (यदि तपाईसँग हामीले तोकेको अधिकृत वारेसनामा छैन भने, कृपया हामीलाई सम्पर्क गर्नुहोस्। हामी यथाशीघ्र हुलाकमार्फत पठाउनेछौं।) टिप्पणी: अधिकृत वारेसनामामा सम्बन्धित व्यक्तिको दर्ता गरिएको आधिकारिक छाप लगाइएको हुनुपर्छ।
                  • सम्बन्धित व्यक्तिको छाप दर्ता भएको प्रमाणपत्र

            2. ख. प्रतिनिधिको आधिकारिक परिचयपत्रको प्रतिलिपि

            3. ग. सम्बन्धित व्यक्तिको परिचय खुल्ने कागजातहरू:

               सम्बन्धित व्यक्तिको आधिकारिक परिचयपत्रको प्रतिलिपि

               टिप्पणी: आधिकारिक परिचय खुल्ने कागजातहरू:

               1. निम्नमध्ये कुनै एक:

                  सवारी चालक अनुमतिपत्र, सवारी चलाएको रेकर्ड भएको प्रमाणपत्र, राहदानी, माई नम्बर कार्ड (नाम र फोटो मात्र देखिने अगाडिको भाग), रेसिडेन्स कार्ड (जाइरियु कार्ड), विशेष स्थायी बसोबास प्रमाणपत्र

               2. निम्नमध्ये दुई वा सोभन्दा बढी:

                  सार्वजनिक स्वास्थ्य बिमा कार्ड, बसोबासको रेकर्डको प्रतिलिपि, बसोबास दर्तामा उल्लेखित विवरणहरूको प्रमाणपत्र, पेन्सन पट्टा, ज्येष्ठ नागरिकको लागि स्वास्थ्य बिमा कार्ड, राष्ट्रिय वा स्थानीय निजामती कर्मचारी कल्याण कोषको सदस्यता प्रमाणपत्र, निजी विद्यालय शिक्षक तथा कर्मचारी कल्याणकारी कोषको सदस्यता कार्ड, बालपोषण भत्ता प्रमाणपत्र, विशेष बालपोषण भत्ता प्रमाणपत्र

                  टिप्पणी: तपाईले पेश गर्नु भएका परिचय खुल्ने कागजातहरू निम्न अनुसार प्रयोग गरिनेछ। यदि तपाई यी शर्तहरूमा सहमत हुनुहुन्छ भने मात्र विवरण खुलासाको अनुरोध बुझाउनुहोला।

                  • सम्बन्धित व्यक्तिले विवरण खुलासा, आदिका लागि गर्नुभएको अनुरोधहरूको सम्बोधन गर्नका लागि उक्त व्यक्तिगत जानकारी प्रयोग गरिनेछ।
                  • कृपया पहिचानका लागि आवश्यक नभएका कुनै पनि संवेदनशील व्यक्तिगत जानकारीलाई पढ्न नमिल्ने बनाएर मात्र पठाउनुहोला।
                  • कानुनले आवश्यक ठहराएको अवस्थामा बाहेक, हामी सम्बन्धित व्यक्तिको सहमति बिना व्यक्तिगत जानकारी तेस्रो पक्षलाई उपलब्ध गराउने छैनौँ। साथै, यस व्यक्तिगत जानकारीको व्यवस्थापन सम्बन्धी कार्य आउटसोर्स गर्ने हाम्रो कुनै योजना छैन।
                  • यदि पेश गरिएका परिचय खुल्ने कागजातहरूबाट तपाईको पहिचान पुष्टि हुन नसकेमा हामी विवरण खुलासा, आदिका अनुरोधहरूलाई सम्बोधन गर्न असमर्थ हुन सक्छौँ।
                  • हाम्रो कम्पनीले व्यक्तिगत जानकारी कसरी व्यवस्थापन गर्छ भन्नेबारे थप जानकारी लिन, कृपया हाम्रो वेबसाइट हेर्नुहोस्।

   3. शुल्क

      "प्रयोगको उद्देश्यबारे जानकारी" लिन वा "विवरण खुलासा" गर्न अनुरोध गर्दा प्रत्येक पटक १,००० यन शुल्क लाग्नेछ। कृपया माथि उल्लेखित कागजातहरूसँगै १,००० यनको हुलाक मनी अर्डर समावेश गरी पठाउनुहोला।

      यदि शुल्क संलग्न गरिएको छैन भने हामी तपाईलाई त्यसबारे जानकारी दिनेछौं, तर तोकिएको अवधिभित्र शुल्क भुक्तानी नभएमा विवरण खुलासा, आदि सम्बन्धी अनुरोध नभएको मानिनेछ। कृपया ध्यान दिनुहोला, तपाईले पेश गर्नुभएको कागजातहरू फिर्ता हुने छैनन्।

      ＜व्यक्तिगत जानकारी सम्बन्धी गुनासो तथा परामर्श डेस्क＞

      ब्रास्टेल कं., लि. व्यक्तिगत जानकारी सोधपुछ डेस्क
      २-६-२ योकोआमी, सुमिदा-कु, टोक्यो १३०-००१५
      इमेल: privacy@brastel.co.jp (कार्यालय समय: 10:00–17:00*)
      *शनिबार, आइतबार, सार्वजनिक बिदा, तथा नयाँ वर्ष र गोल्डेन वीकका बिदाहरूमा प्राप्त भएका सोधपुछहरूको जवाफ आगामी कारोबार दिनमा दिइनेछ।

7. सुरक्षित राखिएको व्यक्तिगत जानकारीको सुरक्षा व्यवस्थापनका लागि अपनाइएका उपायहरू

   1. आधारभूत नीति

      व्यक्तिगत डाटाको उचित व्यवस्थापन सुनिश्चित गर्न, हाम्रो कम्पनीले व्यक्तिगत जानकारी संरक्षण कानूनहरू तथा सम्बन्धित कानुन, नियमावली र मार्गनिर्देशनहरूको पालना गर्दछ। साथै, हामी हाम्रा सेवाहरूसँग सम्बन्धित निम्न निर्देशिकाहरूको पनि अनुसरण गर्दछौं।

      सञ्चारको गोपनीयता सम्बन्धी दूरसञ्चार ऐन तथा "दूरसञ्चार व्यवसायमा व्यक्तिगत जानकारी संरक्षण सम्बन्धी मार्गनिर्देशन"

      "वित्तीय क्षेत्रमा व्यक्तिगत जानकारी संरक्षण सम्बन्धी मार्गनिर्देशन"

      "वित्तीय क्षेत्रमा सुरक्षा व्यवस्थापन उपायहरू सम्बन्धी व्यावहारिक मार्गदर्शन"

   2. व्यक्तिगत डाटाको व्यवस्थापन सम्बन्धी नियमावलीहरूको विकास

      हामीले हरेक चरणको लागि व्यक्तिगत डाटाको व्यवस्थापन गर्न नियमावली बनाएका छौं जसमा डाटा प्राप्त गर्ने, प्रयोग गर्ने, सुरक्षित राख्ने, अरूलाई उपलब्ध गराउने देखि लिएर पूर्ण रूपमा हटाउनेसम्मका नियमहरू पर्दछन्। यी नियमहरूले डाटा प्रयोग गर्ने तरिका, जिम्मेवार व्यक्ति, कार्यभार सम्हाल्ने व्यक्ति र तिनका कर्तव्यहरू स्पष्ट रूपमा तोकेका छन्।

   3. संस्थागत सुरक्षा व्यवस्थापनका उपायहरू

      हामीले व्यक्तिगत डाटा व्यवस्थापनका लागि एक जिम्मेवार व्यक्ति नियुक्त गरेका छौं, कर्मचारीहरूले प्रयोग गर्न पाउने व्यक्तिगत डाटाको दायरा स्पष्ट पारेका छौं र कानून वा व्यवस्थापन नियमावली उल्लङ्घन भएको कुनै तथ्य वा सङ्केत पाइएमा जिम्मेवार अधिकारीलाई तुरुन्त खबर गर्ने संयन्त्र बनाएका छौं।

      साथै, हामी व्यक्तिगत डाटाको व्यवस्थापनको समीक्षा गर्न नियमित रूपमा स्व-अनुगमन गर्नुको साथै अन्य विभागहरू वा बाहिरका पक्षहरूमार्फत लेखापरीक्षण गराउँछौं।

   4. मानवीय सुरक्षा व्यवस्थापनका उपायहरू

      हामी कर्मचारीहरूलाई व्यक्तिगत डाटा व्यवस्थापन गर्दा अपनाउनुपर्ने सावधानीहरूबारे नियमित रूपमा तालिम प्रदान गर्दछौं।

      व्यक्तिगत विवरणहरूको गोपनीयता कायम राख्नका लागि हामीले हाम्रा कर्मचारीहरूसँग गोपनीयता सम्झौता पनि गरेका छौं।

   5. भौतिक सुरक्षा व्यवस्थापनका उपायहरू

      व्यक्तिगत डाटा व्यवस्थापन हुने ठाउँहरूमा, हामी कर्मचारीहरूको आवतजावत र उनीहरूले बोक्ने डिभाइसहरू माथि कडा निगरानी राख्छौँ र अनधिकृत व्यक्तिहरूलाई व्यक्तिगत डाटा हेर्नबाट रोक्ने उपायहरू अपनाउँछौं।

      हामी व्यक्तिगत डाटा व्यवस्थापन गर्ने डिभाइसहरू, इलेक्ट्रोनिक मिडिया र कागजातहरूको चोरी वा नोक्सानी हुन नदिन सुरक्षा उपायहरू लागू गर्दछौं। यसका साथै, व्यावसायिक परिसरभित्र त्यस्ता डिभाइस वा मिडिया ओसारपसार गर्दा व्यक्तिगत डाटा सजिलै सार्वजनिक नहोस् भन्ने कुरा सुनिश्चित गर्दछौं।

   6. प्राविधिक सुरक्षा व्यवस्थापनका उपायहरू

      जिम्मेवार कर्मचारीहरूले प्रयोग गर्न पाउने व्यक्तिगत विवरण समावेश भएका डाटाबेसको दायरा सीमित गर्न हामीले पहुँच नियन्त्रण कार्यान्वयन गरेका छौं।

      व्यक्तिगत डाटा व्यवस्थापन गर्ने सूचना प्रणालीलाई बाह्य स्रोतबाट हुने अनधिकृत पहुँच तथा दुर्भावनापूर्ण सफ्टवेयरबाट सुरक्षित राख्न आवश्यक सुरक्षा संयन्त्रहरू पनि लागू गरेका छौं।

   7. बाह्य वातावरणको व्यवस्थापन

      ग्राहकहरूले हामीलाई विश्वासपूर्वक सुम्पनुभएको व्यक्तिगत जानकारीको सुरक्षालाई हाम्रो कम्पनीले उच्च प्राथमिकता दिन्छ। हामी सावधानीपूर्वक छानिएका र विश्वासयोग्य ठेकेदारहरूलाई सेवा सञ्चालन गर्न अत्यावश्यक पर्ने व्यक्तिगत जानकारी मात्र उपलब्ध गराउँछौं।

      थप जानकारीका लागि, कृपया यहाँ हेर्नुहोस्:
      खण्ड २.१ Shopify सँगको सम्बन्ध र जापान बाहिरका तेस्रो पक्षहरूलाई विवरण उपलब्ध गराउने प्रक्रिया

      
      

      महत्त्वपूर्ण सूचना

      • हुलाक वा कुरियर मार्फत पठाइएका कागजातहरू दुर्घटनावश हराएमा वा डेलिभरी नभएमा हाम्रो कम्पनी जिम्मेवार हुने छैन।
      • कृपया आवश्यक सम्पूर्ण विवरणहरू भर्नुहोस्। अपूरो कागजातहरू फिर्ता हुनसक्छ।
      • व्यक्तिगत जानकारी संरक्षण कानूनका अपवादहरूभित्र पर्ने अवस्थाहरूमा हामी विवरण खुलासा, आदिका निवेदनहरू सम्बोधन गर्न असमर्थ हुनसक्छौं।
      • अनुरोधको विषयवस्तु अनुसार, तपाईको निवेदन उपर कारबाही अगाडि बढाउन केही समय लाग्नसक्छ।
      • विवरण खुलासा आदि सम्बन्धी अनुरोधहरूका लागि सङ्कलन गरिएका व्यक्तिगत जानकारी, त्यस्ता अनुरोधहरू पूरा गर्न आवश्यक पर्ने जति मात्र प्रयोग गरिनेछ। पेश गर्नुभएका कागजातहरू हाम्रो कम्पनीले सुरक्षित रूपमा नष्ट गर्नेछ।
      • "सच्याउने" वा "प्रयोगमा रोक लगाउने आदि" का कारण सम्बन्धित सेवाहरू पछि प्रयोग गर्न नपाउने हुनसक्छ। कृपया यो कुरा पहिले नै ध्यानमा राख्नुहोला।

      टिप्पणी: "सुरक्षित राखिएको व्यक्तिगत डाटा" भन्नाले कम्प्युटरबाट सजिलै खोज्न सकिने गरी व्यवस्थित गरिएका व्यक्तिगत जानकारी वा इन्डेक्सहरू र सङ्केतहरू राखेर सजिलै चाहिने व्यक्तिगत जानकारीहरू प्राप्त गर्नका लागि निश्चित नियम अनुसार मिलाएर तथा वर्गीकृत गरेर राखिएका जानकारीहरूको सङ्ग्रहलाई जनाउँछ। यसमा सम्बन्धित व्यक्तिले विवरण खुलासा गर्न, संशोधन गर्न, विषयवस्तु थपघट गर्न, प्रयोगमा रोक लगाउन, पूर्ण रूपमा मेटाउन र तेस्रो पक्षलाई उपलब्ध गराउने कार्य रोक्नका लागि गरेका अनुरोधहरू सम्बोधन गर्न कम्पनीको पूर्ण अधिकार भएका व्यक्तिगत जानकारीहरू पर्दछन्। थप जानकारीका लागि, कृपया "व्यक्तिगत जानकारी सम्बन्धी गुनासो तथा परामर्श डेस्क" मा सम्पर्क गर्नुहोस्।

8. ग्राहकहरूले स्वेच्छिक रूपमा उपलब्ध गराउने व्यक्तिगत जानकारी र उपलब्ध नगराउँदा हुन सक्ने परिणामहरू

   हाम्रो कम्पनीलाई व्यक्तिगत जानकारी उपलब्ध गराउनु स्वेच्छिक हो। यद्यपि, उपलब्ध गराइएको जानकारी अपर्याप्त भएमा तपाईले (सोधपुछको जवाफ प्राप्त गर्ने लगायत) हाम्रो सेवाहरू प्रयोग गर्न नसक्ने हुन सक्छ।

---

गोपनीयता नीति

स्थापना मिति: १ जुन २०१७
ब्रास्टेल कं., लि.
मुख्य कार्यकारी अधिकृत (CEO): केन्जी खावाई

ब्रास्टेल कम्पनी लिमिटेड (यसपछि "कम्पनी" भनिने) ले सङ्कलन गरिएका सम्पूर्ण व्यक्तिगत जानकारीहरूको सुरक्षासम्बन्धी आफ्नो सामाजिक दायित्वको पूर्ण बोध गर्दै, व्यक्तिगत अधिकार र व्यक्तिगत जानकारीको सुरक्षा सम्बन्धी कानून तथा नियमहरूको पालना गर्नेछ। यसका साथै, कम्पनीले सूचना प्रविधिको नवीनतम प्रवृत्ति, सामाजिक आवश्यकताहरूमा हुने परिवर्तनहरू र व्यावसायिक वातावरणको बदलावलाई निरन्तर ध्यानमा राख्दै तल उल्लेखित नीतिहरूलाई कार्यान्वयन गर्न व्यक्तिगत जानकारी सुरक्षा व्यवस्थापन प्रणाली स्थापना गरेको छ र यसमा निरन्तर सुधारका लागि प्रतिबद्धता व्यक्त गर्दछ।

1. तपाईको व्यक्तिगत विवरण हाम्रो दूरसञ्चार सेवा, रेमिटेन्स सेवा, कर्मचारी भर्ना र कर्मचारी व्यवस्थापन जस्ता कम्पनीका आधिकारिक कार्यहरूका लागि आवश्यक परेसम्म मात्र सङ्कलन, प्रयोग र/वा उपलब्ध हुनेछ। तोकिएको उद्देश्यभन्दा बाहिर यसको उद्देश्यविहीन प्रयोग गरिने छैन र यसरी गलत प्रयोग नहोस् भन्नका लागि कम्पनीले कडा सुरक्षा उपायहरू लागू गर्नेछ।
2. कम्पनीले व्यक्तिगत जानकारीको संरक्षणसम्बन्धी लागू हुने कानुन, सरकारी निकायले जारी गरेका मार्गनिर्देशनहरू तथा अन्य सम्बन्धित मापदण्डहरूको पालना गर्नेछ।
3. कम्पनीले व्यक्तिगत जानकारीको व्यवस्थापनका सम्बन्धमा प्राप्त हुने गुनासा र परामर्शहरूको तुरुन्त र निष्ठापूर्वक सम्बोधन गर्नेछ तथा उपयुक्त उपायहरू अवलम्बन गर्नेछ।
4. वातावरणीय परिवर्तनहरूको प्रतिक्रिया स्वरूप, कम्पनीले व्यक्तिगत जानकारी सुरक्षा व्यवस्थापन प्रणालीलाई निरन्तर पुनरावलोकन गरी उपयुक्त रूपमा सुधार गर्दै जानेछ।
5. कम्पनीले व्यक्तिगत जानकारीको चुहावट, नोक्सानी र क्षति जस्ता जोखिमहरू रोक्न तार्किक सुरक्षा उपायहरू प्राप्त गर्ने उद्देश्यले व्यवसायको वास्तविक अवस्था अनुकूल हुने गरी व्यवस्थापकीय स्रोतहरू परिचालन गरी व्यक्तिगत जानकारी सुरक्षा प्रणालीमा निरन्तर सुधार गर्नेछ। साथै, आपत्कालीन अवस्था सिर्जना भएमा कम्पनीले तत्काल सुधारात्मक कदम चाल्नेछ।

यो नीति सम्पूर्ण कर्मचारीहरूलाई जानकारीका लागि वितरण गरिनेछ र कम्पनीको वेबसाइट, पम्प्लेट तथा अन्य माध्यमहरूमा जोकसैले जुनसुकै समयमा हेर्न सक्ने गरी उपलब्ध गराइनेछ।

【सम्पर्क जानकारी डेस्क】

हाम्रो व्यक्तिगत जानकारी सुरक्षा नीति सम्बन्धी कुनै पनि सोधपुछका लागि, कृपया व्यक्तिगत जानकारी सोधपुछ डेस्कमा सम्पर्क गर्नुहोस्:

ब्रास्टेल कं., लि. व्यक्तिगत जानकारी सोधपुछ डेस्क
२-६-२ योकोआमी, सुमिदा-कु, टोक्यो १३०-००१५
इमेल: privacy@brastel.co.jp
(कार्यालय समय: 10:00–17:00*)

*शनिबार, आइतबार, सार्वजनिक बिदा, तथा नयाँ वर्ष र गोल्डेन वीकका बिदाहरूमा प्राप्त भएका सोधपुछहरूको जवाफ आगामी कारोबार दिनमा दिइनेछ।